Turn fifteenth-century French cursive into checkable text

Charles par la grace de Dieu roy de France. Savoir faisons à tous presens et à venir que nous aians desir et affection que nostre tres chier et tres amé frere le duc de Tourainne, conte de Valoys et de Beaumont sur Oise, soit pourveuz de bonne maison pour la demourance de lui et ses gens en nostre ville de Paris, qui soit en bon lieu et pres de nostre chastel du Louvre ou nous nous tenons le plus souvent quant nous sommes en nostre dicte ville de Paris, afin que promptement et aisieement il puisse venir devers nous et retourner en son hostel toutes foiz qu’il lui venra à plaisir, considerans que la maison de Behaigne assise en ladicte ville en la rue vulgalment nommee la rue de Neelle, et laquelle nous avons nouvellement acquise de nostre tres chiere et tres amee tante la royne et de nostre tres chier et tres amé cousin le roy de Jherusalem et de Secille son filz, est assez pres de nostre dit chastel et bien aisee et convenable pour nostre dit frere, avons icelle maison ainsi comme elle se comporte de lonc et de large avecques touz ses droiz, jardins et appartenances quelconques en quelque lieu qu’ilz se extendent et eslargissent, donné et donnons de grace especial par ces presentes à nostre dit frere franchement et entierement, senz retenir aucune chose de la dicte maison ne des dictes appartenances, à tenir, avoir et possider la dicte maison entierement avecques toutes ses appartenances par nostre dit frere, ses hoirs, successeurs et ayans cause à tousjours et perpetuelment comme leur propre chose et heritage, si donnons en mandement à noz amez et feaulx gens de noz comptes et conseilliers sur le fait de nostre demaine à Paris, au prevost de Paris et à touz noz autres justiciers et officiers ou à leurs lieuxtenens, presens et à venir, et à chascun d’eulx si come à lui appartendra, que de nostre presente grace et don facent, sueffrent et laissent joir et user paisiblement nostre dit frere, ses hoirs, successeurs et aians cause, senz faire ou aller ores ne pour le temps à venir en aucune maniere au contraire. Et pour ce que ce soit ferme chose et estable à tousjours, nous avons fait mettre nostre seel à ces presentes lettres, sauf en autres choses nostre droit et l’autrui en toutes. Donné à la noble maison de Saint Oyn ou mois de juing, l’an de grace mil trois cens quatre vinz et huit, et le huitiesme de nostre regne.

Transcription from Archives nationales, transcription of K 532 B no. 17 (1388), validated text on French Wikisource (CC BY-SA 4.0).

Mardy Xe jour de may, fut rapporté et dit à Paris publiquement, que dimanche derrenier passé, les gens du dauphin en grant nombre, aprez pluiseurs assaulz continuelment entretenuz par force d’armes, estoient entrez dedens la bastide que tenoient Guillaume Glasdal et autres capitaines et gens d’armes anglois de par le roy, avec la tour de l’yssue du pont d’Orléans par delà Loyre ; et que ce jour, les autres capitaines et gens d’armes tenans le siège et les bastides par deçà Loyre, devant la ville d’Orléans, s’estoient partiz dicelles bastides, et avoient levé leur siège pour aller conforter ledit Glasdal et ses compagnons, et pour combatre les ennemis qui avoient en leur compagnie une pucelle, seule ayant banière entre lesditz ennemis, si comme on disoit. Quis eventus fuerit, novit Deus bellorum dux et princeps potentissimus in prœlio.

Transcription from Jules Quicherat (ed.), Procès de condamnation et de réhabilitation de Jeanne d’Arc, tome IV (Paris, 1847), Clément de Fauquemberque, pp. 451–452, via Internet Archive (Public domain).

Chers et bons amis, vous savez bien comment la ville de Saint-Pierre le Moustier a esté prinse d’assault ; et, à l’aide de Dieu, ay entencion de faire vuider les autres places qui sont contraires au roy ; mais pour ce que grant despense de pouldres, trait et autres habillemens de guerre a esté faicte devant ladicte ville, et que petitement les seigneurs qui sont en ceste ville et moy en sommes pourveuz pour aler mectre le siège devant La Charité, où nous alons présentement : je vous prie sur tant que vous aymez le bien et honneur du roy et aussi de tous les autres de par deçà, que vueillez incontinant envoyer et aider pour ledit siège, de pouldres, salpestre, souffre, trait, arbelestres fortes et d’autres habillemens de guerre. Et en ce faictes tant que, par faulte desdictes pouldres et autres habillemens de guerre, la chose ne soit longue, et que on ne vous puisse dire en ce estre négligens ou refusans. Chiers et bons amis, Nostre Sire soit garde de vous. Escript à Molins, le neufviesme jour de novembre.
Signé : Jehanne.
Sur l’adresse : A mes chers et bons amis, les gens d’église, bourgois et habitans de la ville de Rion.

Transcription from Jules Quicherat (ed.), Procès de condamnation et de réhabilitation de Jeanne d’Arc, tome V (Paris, 1849), Lettres, actes et autres pièces détachées, no. XX, pp. 147–148, via Internet Archive (Public domain).