Read the mixed hands of Renaissance France

111. Et pour ce que telles choses sont souvent advenues sur l’intelligence des mots latins contenus esdits arrests, nous voulons d’oresnavant que tous arrests, ensemble toutes autres procédures, soient de nos cours souveraines et autres subalternes et inférieures, soient de registres, enquestes, contrats, commissions, sentences, testaments, et autres quelconques, actes et exploicts de justice, ou qui en dépendent, soient prononcés, enregistrés et délivrés aux parties en langage maternel françois et non autrement.
112. Nous voulons que les impétrans de lettres, pour articuler calomnieusement faicts nouveaux, s’il est trouvé qu’ils ne servent à la décision du procez, seront condamnés envers nous en l’amende ordinaire du fol appel en nos cours souveraines, et vingt livres parisis ès-inférieures, et moitié moins aux parties, et plus grosses si métier est comme dessus.

Transcription from F.-A. Isambert et al. (eds), Recueil général des anciennes lois françaises, tome XII (Paris, 1828), ordonnance d’août 1539, arts. 111–112, via Internet Archive (Public domain).

Mons.r de la Bourlie, Envoyant mon cousin, mons.r le vicomte de Turenne, par delà pour y assembler mes serviteurs, je vous ay voulu faire ce mot pour vous prier vous trouver au lieu qu’il vous mandera et au temps que vous sçaurez. Il vous dira aussi comme j’espère vous voir en bref, et donner tel acheminement à mes affaires, que je m’asseure y voir en brief l’issue, avec autant d’utilité et contentement que sçaurions désirer ; à quoy participeront tous les gens d’honneur qui m’assistent en si juste cause. L’asseurance que j’ay que ferés ce que vous dira mon dict cousin, comme de rechef je vous en prie, me fera, après vous avoir asseuré de mon amitié, prier Dieu, Mons.r de la Bourlie, qu’il vous ait en sa saincte garde. C’est
Vostre bien affectionné,
HENRY.
Du Mont de Marsan, ce xe octobre 1585.

Transcription from M. Berger de Xivrey (ed.), Recueil des lettres missives de Henri IV, tome II (Paris, 1843), pp. 135–136, via Internet Archive (Public domain).

l’autre, d’un melange si universel, qu’elles effacent et ne retrouvent plus la couture qui les a jointes. Si on me presse de dire pourquoy je l’aymois, je sens que cela ne se peut exprimer, [qu’en respondant : Par ce que c’estoit luy ; par ce que c’estoit moy.] Il y a, au delà de tout mon discours, et de ce que j’en puis dire particulierement, ne sçay quelle force inexplicable et fatale, mediatrice de cette union. [Nous nous cherchions avant que de nous estre veus, et par des rapports que nous oyïons l’un de l’autre, qui faisoient en nostre affection plus d’effort que ne porte la raison des rapports, je croy par quelque ordonnance du ciel : nous nous embrassions par noz noms. Et à nostre premiere rencontre, qui fut par hazard en une grande feste et compagnie de ville, nous nous trouvasmes si prins, si cognus, si obligez entre nous, que rien des lors ne nous fut si proche que l’un à l’autre. Il escrivit une Satyre Latine excellente, qui est publiée, par laquelle il excuse et explique la precipitation de nostre intelligence, si promptement parvenue à sa perfection. Ayant si peu à durer, et ayant si tard commencé, car nous estions tous deux hommes faicts, et luy plus de quelque année, elle n’avoit point à perdre temps, et à se regler au patron des amitiez molles et regulieres, ausquelles il faut tant de precautions de longue et preallable conversation. Cette cy n’a point d’autre idée que d’elle mesme, et ne se peut rapporter qu’à soy.] Ce n’est pas une speciale consideration, ny deux, ny trois, ny quatre, ny mille : c’est je ne sçay quelle quinte essence de tout ce meslange, qui, ayant saisi toute ma volonté, l’amena se plonger et se perdre dans la sienne ; [qui, ayant saisi toute sa volonté, l’amena se plonger et se perdre en la mienne, d’une faim, d’une concurrence pareille.] Je dis perdre, à la verité, ne nous reservant rien qui nous fut propre, ny qui fut ou sien ou mien. Quand Laelius, en presence des Consuls Romains, lesquels, apres la condemnation de Tiberius Gracchus, poursuivoyent tous ceux qui avoyent esté de son intelligence, vint à s’enquerir de Caius Blosius (qui estoit le principal de ses amis) combien il eut voulu faire pour luy, et qu’il eut respondu : Toutes choses ; — Comment, toutes choses ? suivit-il. Et quoy s’il t’eut commandé de mettre le feu en nos temples ? — Il ne me l’eut jamais commandé, replica Blosius. — Mais s’il l’eut fait ? adjouta Laelius. — J’y eusse obey, respondit-il. S’il estoit si parfaictement amy de Gracchus, comme disent les histoires, il n’avoit que faire d’offenser les consuls par cette dernière et hardie confession ; et ne se devoit départir de l’asseurance qu’il avoit de la volonté de Gracchus. Mais, toutefois, ceux qui accusent cette responce comme seditieuse, n’entendent pas bien ce mystere, et ne presupposent pas, comme il est, qu’il tenoit la volonté de Gracchus en sa manche, et par puissance et par connoissance. [Ils estoient plus amis que citoyens, plus amis qu’amis et qu’ennemis de leur païs, qu’amis d’ambition et de trouble. S’estans parfaittement commis l’un à l’autre, ils tenoient parfaittement les renes de l’inclination l’un de l’autre ; et faictes guider cet harnois par la vertu et conduitte de la raison (comme aussi est-il du tout impossible de l’atteler sans cela), la responce de Blosius est telle qu’elle devoit estre. Si leurs actions se demancharent, ils n’estoient ny amis selon ma mesure l’un de l’autre, ny amis à eux mesmes. Au demeurant] cette responce ne sonne non plus que feroit la mienne, à qui s’enquerroit à moy de cette façon : Si vostre volonté vous commandoit de tuer vostre fille, la tueriez vous ? et que je l’accordasse. Car cela ne porte aucun tesmoignage de consentement à ce faire, par ce que je ne suis point en doute de ma volonté, et tout aussi peu

Transcription from Montaigne, Essais, édition de Bordeaux, transcription of the annotated leaf on French Wikisource (CC BY-SA 4.0).

Entre les grâces infinies qu’il a pleu à Dieu de nous départir, celle ci est bien des plus insignes et remarquables, de nous avoir donné la vertu et la force de ne céder aux effroyables troubles, confusions et désordres, qui se trouvèrent à nostre advénement à ce royaume, qui estoit divisé en tant de partis et de factions que la plus légitime en estoit quasi la moindre, et de nous estre néantmoins tellement roidis contre ceste tourmente, que nous l’ayons enfin surmontée, et touchions maintenant le port de salut et repos de cet estat ; de quoy à lui seul en soit la gloire toute entière, et à nous la grâce et obligation qu’il se soit voulu servir de nostre labeur pour parfaire ce bon œuvre, auquel il a esté visible à tous si nous avons porté ce qui estoit non seulement de nostre devoir et pouvoir, mais quelque chose de plus qui n’eust peut estre pas esté en autre temps bien convenable à la dignité que nous tenons, que nous n’avons plus eu crainte d’y exposer, puisque nous y avons tant de fois et si librement exposé nostre propre vie.

Transcription from F.-A. Isambert et al. (eds), Recueil général des anciennes lois françaises, tome XV (Paris, 1829), no. 124, édit de pacification dit de Nantes, via Internet Archive (Public domain).